16 Mosambiekse vroue in Barberton gevonnis vir oortreding van die Immigrasiewet

16 Mosambiekse vroue is gister in die Barberton-landdroshof skuldig bevind en gevonnis vir oortreding van die Wet op Immigrasie. Volgens die Valke se woordvoerder in Mpumalanga, Kaptein Dineo Sekgotodi, was hulle na vermoede onderweg na Johannesburg toe hulle Vrydagaand by Kaapmuiden aangekeer is sonder paspoorte of permitte om in die land te wees. Hulle is elkeen met 2-duisend-Rand beboet of ses maande tronkstraf opgelê, wat vir vyf jaar opgeskort is. Die hof het verder gelas dat hulle dadelik na Mosambiek gedeporteer word. Die 15 manlike beskuldigdes wat saam met hulle aangekeer is, verskyn weer op 20 Augustus in die hof.