ActionSA werk aan plan om padnetwerk verder te ontwikkel

ActionSA sê hy sal nou begin met die ontwikkeling van 'n omvattende bloudruk om Suid-Afrika se padnetwerk te herstel, en sal dit voor die verkiesing aan Suid-Afrikaners voorlê. Die party het sy veldtog oor swak paaie afgesluit na besoeke aan gemeenskappe regdeur Mpumalanga, Limpopo en Noordwes. Michael Beaumont van ActionSA sê die party beplan om Suid-Afrikaners te inspireer met die wete dat die komende verkiesing tot verandering in die land kan lei danksy 'n gekoördineerde en professionele program van vernuwing vir die land se padnetwerk.