Vier vas na diefstal van polisievuurwapen

'n Polisiebeampte sal binnekort in die hof verskyn na hy saam met 'n taverne-eienaar gearresteer is vir die beweerde diefstal van ‘n polisievuurwapen. Volgens die polisiewoordvoerder in Mpumalanga, Brigadier Selvy Mohlala, het die 9-millimeter-pistool tussen 16 en 17 Desember by die Gemeenskaps-polisie-dienssentrum in Morgenzon verdwyn en het die polisiesersant dit glo aan die taverne-eienaar verkoop. Tydens 'n soektog Vrydag is verskeie vuurwapens in die verdagtes se besit gevind, waaronder 'n haelgeweer, nog 'n pistool sowel as ammunisie vir 'n R5-geweer. In totaal is vier verdagtes in hegtenis geneem.